جلسة مع النفس ….
كتبهاالقطة الشقية ، في 1 أغسطس 2007 الساعة: 04:28 ص
ياااااااااااااااااااااه
امبارح نمت كويس اوي الحمد لله
اصبحنا واصبح الملك لله
اللهم ما اجعله يوم جميل ومشرق وكله خير يا رب
الله
النهارده الجو حلو اوي اوي
ايه رايك يا بنتي لو اخدتي اجازة النهارده من كل حاجة ممكن تكوني بتعمليها كل يوم
وفرصة النهارده الجمعة يعني اجازة كمان من الشغل
اجازة ل(نفسك)
زي ما جسمك ومخك بياخدوا اجازة
هي كمان محتاجة راحة ولو ليوم واحد
شكل البحر يجنن
صفاؤه
لونه
هدوءه
سكونه
ما هي النفس البشرية شبه البحر
ساعات هادية
بس ساعات تانية مجنونة
ساعات راضية
بس ساعات تانية متمردة
ساعات صافية
بس ساعات تانية متعكرة
طيب مالك الفترة اللي فاتت مش مرتاحة ولا صافية ولا راضية عن حالك ؟؟؟
حاسة بك من فترة طويلة انك في حالة اضطراب ومش في حالة سكون وهدوء ؟؟
ليه بتتحملي فوق طاقتك ومع ذلك مش بتتكلمي ولا بتعبري عن اللي جواكي ..وده كتير اوي عليكي …
انا خرجت انا وانتي لوحدينا علشان تفضفضي وتصارحيني باللي حاسة به ونتناقش يمكن نوصل لحلول لاي حاجة مضايقاكي ،، وعلى الاقل يقلل ده من اي ضغوط او توتر او ملل .
تتنفس (النفس) شهيق طويل من نسيم البحر الرائع وتصمت قليلا لتبدأ الحديث عما يدور بخلدها …….
يااااااااااااااااااااااااااه ده في حاجات كتير اوي اوي مضايقاني
في حاجات كتير اوي في الدنيا مش عارفة اتاقلم معاها ومن غير ما تساليني انا اقولك زي ايه
1- اختلاف احوال الناس كل يوم من سئ لأسوأ ، اختلاف الاخلاقيات ، اختلاف نظرتهم للدنيا ، اختلاف نظرتهم للدين ، اغلب الناس نسوا يعني كلمة صدق ، وفاء ، اخلاص ، احترام ، حلال ، حرام ، عيب ، ميصحش ، اعتراف بالجميل ، تفاني العمل ، ……………………… دي حاجات كتير اوي اوي ،،، وانما المبادئ المتعارف عليها دلوقتي بقيت غير
* اشمعنى ده عنده وانا لأ يعني حقد
* خبي على موضوعك علشان يمشي بمعنى (داري على شمعتك تضئ) يعني حسد
* انا مش هاعمل الشغل ده لما ارمي على فلان علشان يخلصه يعني تواكل
* انا هاصاحب فلان مش علشان محترم وانما علشان ملفت للنظر وبيعرف ازاي يعيش الحياة - نسهر ، نرقص ، نسافر ، نشيش ، ……….- من الاخر (روش بلغة اليومين دول)
* شهادة الزور والكذب والخيانة وتلفيق التهم و………………. كتير اووووووووووووي
2- مبقاش في حاجة اسمها صديق صدوق …. حتى لو افتكرتي ان اقرب شخص لكي هو اصدق صديق !! لأ بتكتشفي انه اغرب غريب ساعتها ممكن يختل توازنك وخصوصا لو بتتعامل معاه بصفاء نية ومن غير ادنى شك في انه الشخص الصح …. يعني معنى كده انك تنسى بقى موضوع الصداقة واللي بتشوفيها في الافلام العربية بتاعت (احلام هند وكاميليا)
3- تعالي بقى نتكلم عن القلب ومشاكله ….. في مشكلتين هل من المعقول اللي بيحصل لك ده تواجهي موقفين غريبين جدا عن الطبيعي
a. اللي تحبيه مش ليكي (مش مشكلة لانها بتحصل كل يوم بس الصدمة بقى انك تفتكري انك قافلة ايديك على اغلى حاجة في الدنيا ومتاكدة انك مالكاها وبعدين تفتحي اديكي تكتشفي ان ما فيهاش غير الهوا)
b. الاغرب والاغرب بقى ان تكتشفي ان في اللي بيحبك ويتمناكي ويعمل اي حاجة علشان يرضيكي ومستعد للارتباط بيكي اللحظة دي قبل اللحظة الجاية …. هتسالي ايه المشكلة ؟؟ ظروفه غلط خالص متجوز وعنده ولاد …قبل ما تنطقي بكلمة انا رافضة وقلت له الكلام ده وقطعت الموضوع ولكن الصراع اللي عايشة فيه بين الصح والغلط هو اللي تاعبني ومأزمني …
انتي جبتيني هنا علشان اقولك على اللي جوايا ومن غير كسوف او اني اخبي حاجة لمجرد الفضفضة اللي جوايا كتير بس يمكن لخصتها في النقاط دي لانها الرئيسية
سامحيني لاني عارفة ان ارتباكي يعني ارتباك حالتك النفسية يعني ارتباك حياتك كلها بس صدقيني غصب عني
يا ترى تقدري تساعديني في كل نقطة من النقاط دي علشان اعرف اعمل ايه ؟؟؟
رديت
ياااااااه كل ده يا نفسي شايلاه …. وانا غافلة عنك بشغلي وحياتي وحاسة بيكي بس قلت انها المواقف اليومية الطبيعية واللي مش ممكن تأثر فيكي اوي كده !!!
يا ترى ايه النصيحة اللي ممكن اوجهها لنفسي علشان تحل مشاكلها ؟؟؟
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
اهلا بالساده الزوار
أغسطس 1st, 2007 at 1 أغسطس 2007 10:24 ص
لو امضينا العمر نحل مشاكلنا ونراقب همومنا لما وسعنا ذلك…
بعضها طويل ومعقد والاخر صعب الحل او لا حلول له او ان حلوله ستربك اخرين…
الافضل ان القي همومي على ربي واعيش هذه الحياة
هي حياة واحدة فلاعشها كما اريد انا متحديا كل الظروف والعقبات …لن ادعها تتحكم فيّ…
قد أبدأ ضعيف وهشا لكن مع الوقت اصبح قوبا ومصدا للظروف…
عندها ستخاف مني ولا تقترب…
التجرية خير دليل..
احترامي صديقتي
نزار احمد
أغسطس 1st, 2007 at 1 أغسطس 2007 10:37 ص
الصديق /نزار
بالتاكيد مع كل مشكلة تقوي فيها جزء ومع الايام تتم القوة الصورة الكاملة
ولكن في بعض الاحيان ما يصدمنا هو ما يكسرنا ويضعفنا
اشكرك على النصيحة والتي سأقدمها لنفسي لتحاول من جديد …
تحياتي
أغسطس 2nd, 2007 at 2 أغسطس 2007 2:42 ص
قطقوطة الحبيبة..
ماذا اقول لك ياعزيزتي .. جلســة النفس.. هي جلسة تاريخ الانسان .. منذ بداية الخلق.. منذ حواء وآدم.. وهابيل وقابيل.. الانسان جعله الله مخلوق كريم رائع .. وفي نفس الوقت.. ظلوم كفور جهول.. يعني الدنيا فيها ملائكة تجعل الحياة حلوة طيبة.. وفيها شياطين.. تنغص علينا حياتنا..
والناس جميلة الروح مثلك عندما تجد ملائكة تتمسك بها.. وعندما تجد شياطين.. تحمد ربنا أن أعطاها الحكمة لتعرفهم وتبتعد عنهم..
وأحيانا نقابل ناس لا نعرف أن كانت معرفتهم خير أم شر.. وهنا نترك الحكم لله فنرضى بما يختاره لنا .. فان ابعدهم فهو اكيد خير.. لان الخير فيما يختاره الله..
المهم في كل وقت وكل آوان يكون الانسان نفسه.. أي يتمسك بالقيم التي ارتضاها واختارها .. لا يتخلى عنها أبدا.. حتى لو كل الكون تخلى عنها.. لان في النهاية الفوز يكون ..حتما.. حتما.. للنوايا الطيبة..
سعيدة بعودتك ايتها الحبية.. ونفسك الشفافة الجميلة.. تدعوني للتفاؤل بمستقبل جميل زاهر بإذن الله..
أغسطس 2nd, 2007 at 2 أغسطس 2007 11:37 ص
هكذا النفس البشرية ورحلة حياة الإنسان رحلة على محيط الدائرة
تحياتي لك ولقلمك الجميل
أغسطس 2nd, 2007 at 2 أغسطس 2007 12:43 م
ياااااااااااااااااااااااااااااااااااااااااااااااااااااااااه
صحيح القطط بسبع ارواح ..
يعنى قدامك كمان ست اعتذارات و دموع و مشاكل
و ساعتها يمكن ..
يمكن .. نقلق عليكى ..
بجد .. بجد ..
دخلة الموضوع و العرض … هايلة ..
و الفكرة … بسيطة جدا .. و كمان عميقة جدا جدا …
و الغرض .. حوار مع النفس .. رائع .. و نادر .. المشكلة ان الكل بيخدع نفسه .. أو الغالبية أدق كده … اللى موش بيعمل الحوار ده يا قطة .. بقولك ايه متشوفيلك أسم حركى اسهل .. موش موضوعنا .. اللى موش بيعمل الحوار ده بيعيش فى وهم .. كشارب المخدرات .. و تكون آخرته صدمة .. الحمد لله انتى اتعافيتى بدرى …!!!!صح ..
أصناف الناس و انواعهم و صفاتهم دى حاجات موجودة من اول الخلق للأبد بس انتى اللى لسة صغيرة
.. بدأت اعترف بغلطى ف موضوع الشتين سنة ..
أغسطس 2nd, 2007 at 2 أغسطس 2007 12:48 م
الصراع اللى عايشاه ..
سبحانه و تعالى وصفه ف الكتاب الكريم ” النفس اللوامة ” التى عندما تخطأ أو حتى تفكر فى أقتراف الخطأ تلوم نفسها …!!!!!
الدين و القرآن شىء رائع لمن يتخذه منهج و يتأمل فيه بعمق .. النفس اللوامة صنف جميل من النفوس ضميرها صاحى و لا تتعود الغلط أبدا ..
و من غير ما تنصحى نفسك .. هى لوحدها موش ح تقبل غير الصح و موش ح ترضى ابدا بالغلط ..
تحياتى
أغسطس 2nd, 2007 at 2 أغسطس 2007 11:07 م
استاذتي الفاضلة الحبيبة / سامية
اشكرك على تلبية دعوتي وزيارتك لي وانا اللي سعيدة بعودتي بينكم من جديد….
جلسة النفس عامة من اصعب ما يكون ، والشاطر بينا اللي يقدر عليها ويعرف ازاي يصالح ويصارح نفسه ليريحها ويريح ضميره ويستريح لينعم بايامه…
كما ان التمسك بالمبادئ السليمة والاخلاقيات المأمور بها كالذي يمسك على قطعة من الجمر في ظل كل المتغيرات السائدة هذه الايام
تحياتي وحبي لك سيدتي
أغسطس 2nd, 2007 at 2 أغسطس 2007 11:09 م
اسامة عبد الصبور
اشكرك وتحياتي لك على الزيارة والمشاركة
أغسطس 2nd, 2007 at 2 أغسطس 2007 11:23 م
الصديق العزيز/ عادل سعيد
حرام اديك شفت مرة واحدة عملت فيا ايه ؟؟لسه منتظر 6 مرات تانية …اد كده مضايقاك ولو اني عارفة معزتي عندك….
المهم
ما اصعب النفس اللوامة كما ذكرت لاني فعلا من هذا النوع ولو انها افضل بكثير من النفس الامارة بالسوء …على الاقل بتوقفنا عند كل غلط وتحاسبنا وتأنبنا بشدة كالكرباج ..
نوعية الناس كما ذكرت مختلفة من قديم الازل ولكنها وللاسف بدات تختلف بشكل كبير بمعنى ان المنحنى بيميل للانحدار بشكل كبير وسريع اوي لا استطيع ملاحقته ولا استطيع اصلا ان انحدر معه لذلك اشعر بالغربة الفظيعة دي…
انا مش بقول كده علشان انا ملاك على الارض …. لأ انا برضه اكيد فيا اخطاء بس برضه مش قادرة ولا عارفة اغير مبادئي واخلاقي اللي اتربيت عليها..
دوشتك معايا واسفة اني طولت عليك
تحياتي
أغسطس 5th, 2007 at 5 أغسطس 2007 8:00 ص
وادى اللى اخدتيه من الاجازه
حبيتى تسعدى نفسك هى اللى تعبتك
طب وبعدين
أغسطس 5th, 2007 at 5 أغسطس 2007 9:27 ص
امال انا طلبت منك النصيحة ليه يعني يا نورس ؟؟
ما هو ساعات كده تلاقي حاجات مش معمول حسابها…
برضه مقولتش
انصحها بايه ؟؟؟
أكتوبر 6th, 2008 at 6 أكتوبر 2008 7:36 م
الله